تحليل إنزيمات الكبد

تحليل إنزيمات الكبد , ممكن المريض يعمله , و يدخل الصيدلية و هو مرعوب , و محتاج اللى يطمنه .. و عشان كده , لازم أقول لك شوية معلومات مهمة , تخليك تعرف الدنيا بتبقى ماشية إزاى ! ..

إنزيمات الكبد , مكانها الطبيعى هو
خلايا الكبد .. إحنا بقى بنحلل نسبتها فى الدم .. معنى ده إننا بنشوف هى خرجت من الكبد و تواجدت فى الدم بنسبة قد إيه ! .. و معنى إنها موجودة فى الدم بكمية كبيرة , إن حصل التهاب (ضرر أو مكروه) لخلايا الكبد يعنى .. و ده بيدينا صورة مبدئية بخصوص الحالة , لكن ما نقدرش نجزم بوجود مشكلة فى الكبد لو شفنا الإنزيمات عالية فى أول مرة .. للأسباب الآتية ..

أولا : الإنزيمات ممكن ترتفع بشكل مبالغ فيه (أكتر من 10 أضعاف النسبة الطبيعية) , لو كان المريض مصاب بفيروس A .. و ده بيسبب أعراض حادة , .. و بيكون علاجه بسيط يعتمد على الراحة .. و المريض المفروض ما يقلقش .. و لكن يحاول منع العدوى عن أهله و المحيطين به .. و العدوى هنا بتنتقل عن طريق الفم .. يعنى أكل أو شرب .. (و برضه ممكن ترتفع بالشكل ده فى حالات التسمم أو الجرعة الزائدة من الباراسيتامول) ..

ثانيا : الإنزيمات ممكن تكون طبيعية جدا , عند الناس اللى فى المراحل الأخيرة خالص من أمراض الكبد , و ده لإن الكبد بيكون كله اتدمر تقريبا , و ما بقاش فى خلاياه إنزيمات تخرج فى الدم , لو اتدمر أكتر من كده ... و عشان كده , ما ينفعش نعتمد على التحليل ده فى المرحلة دى ..

ثالثا : التحليل بيتأثر جدا لو كنت حضرتك متقل فى الوجبة اللى قبله , أو كانت مليانة بروتينات .. و عشان كده , ساعات الأطباء بيحبذوا إعادة التحليل أحيانا , بس يكون المريض واكل قبلها أكل خفيف

النصيحة : ما تترعبش لو بصيت فى تحليل معين , و لقيت النتيجة بعيدة عن النسبة الطبيعية .. اسأل الصيدلى اللى بتثق فيه قبل ما تبنى خوف ممكن يكون غير حقيقى .. و احنا حنطمنّك ..