معلومات هامة جدا عن حقن المضادات الحيوية

عشان صحتك تهمّنى , اسمح لى أقول لك شوية معلومات بخصوص حقن المضادات الحيوية ..

معظم حقن المضادات الحيوية , بتبقى على شكل بودرة , و بعد كده بيتحط عليها مية , قبل الحقن علطول (تتحل يعنى) .. فيه منها اللى بيدوب , زى سيفوتاكس مثلا .. و فيه منها
اللى مش بيدوب , زى بينسيتارد أو ديبوبن .. إلخ ..

المهم إن الحقن دى معمولة على شكل بودر , عشان لو كانت اتعملت على هيئة محلول أو معلّق جاهز للحقن , كان زمانها باظت , لإن المادة الفعالة اللى فيها , بتبوظ بسرعة .. و دى المشكلة .. و عشان كده , دايما بنقول إنه من الأفضل إننا "ماااااااااااااا نقسمششششش الحقنننننن على أكتررررررر من مررررررررة" .. يعنى طبيا و صيدلانيا : الأفضل هو إن كل حقنة يتم تعاطيها على مرة واحدة .. يعنى بدل ما ناخد حقنة سيفوتاكس 1 جرام (1000 ميلليجرام يعنى) , و نقسمها على مرتين , و ناخد نص الحقنة (500 مجم) يعنى فى كل مرة , .. الأفضل إننا نحصل من البداية على حقنتين سيفوتاكس 500 مجم , و نحلّ كل واحدة فى وقت تعاطيها ..

الخطورة مش واضحة قوى فى المثال اللى فات , لإن المادة الفعالة ممكن تفضل سليمة لمدة أكثر من 12 ساعة داخل التلاجة .. أما الخطورة الحقيقية , فبتظهر مع حقن تانية , زى يوناسين أو يونيكتام مثلا .. , اللى ممكن يفقد فاعليته بعد 8 ساعات بس من وجوده بره التلاجة .. (لكن ممكن يفضل سليم , لو فضل جوه التلاجة , بين درجة حرارة 2 و 8 درجة مئوية) .. تمام ؟؟

النصيحة : مش عشان نوفّر 4 جنيه (الفرق بين سعر حقنة بتركيز , و حقنتين بنصف تركيز) نقوم نختار إننا نقسم حقنة على مرتين (و ساعات أكتر) .. الأصح إننا ناخد من الـ فيال (الحقنة يعنى) , بطريقة سليمة (على بعضه) , أو ناخد منه اللى نحتاجه و نتخلص من الباقى , لو مش حنحطّه فى التلاجة .. و اسأل الصيدلى اللى بتثق فيه عن إمكانية تقسيم الحقنة على أكثر من مرة .. و اطلب دايما من طبيبك إنه يكتب لك الحقن اللى بتتاخد على مرة واحدة و مش بتتقسم , عشان احنا ما نضمنش إن التلاجة عندك تكون سليمة علطول !!